كام مرة سألت واحد انك عاوز تاخد كورس منشطات سألك انت تعرف ايه عنها ؟ تقوله لسة حاجات بسيطة , يقوم يقولك طب اقرا عنها كام شهر الاول وبعدين تعالى اسأل عشان تاخدها
طب احنا كل ما نلف في جميع المنتديات العربية ونسأل ونقرا عن المنشطات بنلاقي حاجة من اتنين يا إما المنشطات ضارة جدا بالصحة وتؤدي الى الوفاة
واضرار المنشطات , معا ضد المنشطات والكلام ده كتير , وطبعا كله كلام حلو انا مش ضد او مؤيد بس انا حابب اني افتح آفاق جديد في المنتديات العربية وتبدأ من الدي في دي من عندنا من هنا 
من اكتر الشائعات اللي الناس في العالم كله مش في عالمنا العربي بس بتتداولها هي كالآتي :
اضرب حقنتين , بلبع بورشامتين , وانت هتبقى بطل من ابطال اللعبة ... الواد ده جسمه جامد فشششششششششششششششششر , جامد ايه يا عم سيبك انت ده مأنجك يعني كل ده كلام فاضي انت يا عم شايف الواد اللي هناك جسمه عامل ازاي ؟ , يا عم فكك ده انا لو اخدته مقص هجيبه الأرض ده نفخ هوا 
واللي كل الناس مش قادرة تفهمه , واللي لازم كلنا نفهمه ان اولا اللعبة دي مش لعبه خناقات يعني مش عشان ببني جسمي يبقى ببنيه عشان اتخانق او عشان افرد نفسي على كل خلق الله وهي مش لعبة قتالية يعني مفيش حكم على العضل بالخناق والقتال والكلام ده
ثانيا : عشان تبني جسمك حتى لو بالمنشط لازم تمرين من حديد وتنظام تمرين من حديد ونظام تغذية من حديد وراحة تامة جدا لا تقل 8 ساعات ليلة او ما يتطلبه كل جسم كحد أدني ...
يعني انت عاوز تقول ايه ؟
يعني انت مثلا برفع 280 كيلو LEG PRESS من غير منشطات وبتتمرن جامد وبتاكل جامد هل انت عشان تعمل كورس منشطات يبقى هتلعب بنفس الوزن ده ؟
بالعكس جدا ده انت هتلعب بيه وهيبقى هدفك الأول ازاي تعلى عن الوزن ده بفورمة حديد وركزوا معايا أوي على فورمة حديد دي يعني مش يا فرحتي بزود وزن وخلاص
يعني تخيل انت مجهودك عامل ازاي وحط على الأقل الضعف للي بياخد منشطات , يعني العملية مش سهلة زي مانتوا متخيلين , اقولك كمان تحسبها ازاي ....
شوف زميل تمرينك اللي دايما معاك واوزانك شبه بعض وخليه ياخد منتج أن أو ومعاه منتج كرياتيني او منتج باور ومنتج ريكوفري وشوفه هيبقى عامل ازاي وهيفرق عنك في وقت عامل ازاي , قيس عليها المنشطات
المنشطات مش ساحر او هوا زي ما الناس متخيله وإلا كنت روحت بنزينة الوطنية وخليته نفخلي على 60
من غير ما اعرض نفسي لأخطار المنشطات ... والتمرين والاكل والمجهود والكلام ده كله غير الاعراض النفسية اللي بيتعرضلها اللي بياخد المنشطات ومع ذلك بيواظب على تمرينه ومؤمن بالهدف اللي عامله لنفسه ...
خلينا ننهي المقدمة وندخل على الموضوع على طول ........
الكورس و الاستاك
الفترة الزمنية اللي بيواظب فيها اللاعب على تعاطي المنشطات دي بتسمى الكورس , ودي بتبقى مددة وليها حد اقصى لا يمكن تجاوزه لاسباب امن وسلامة الجسد وصحته , والمفروض ان يتم تنظيم الكورس قبل البداية فيه يعني مش ينفع اخبطلي حقنتين ديكا درا. وبعدين اقول تمام ابني عليها كورس بقى لا ما ينفعش ..
الخطة المحكمة لكورس المنشطات مش بتكون عن المواعيد بس يعني مواعيد وتقسيم جرعات , لا بتكون كمان بجمع كل المعلومات الممكنة عن المنشط اللي هتدخل بيه الكورس , في حالة وجود اكتر من منشط في الكورس بتاعك المجموعة دي من المنشطات بتسمى الاستاك , ودي بتكون من افضل الطرق للاستفادة من الكورس بتاعك بدمج اكتر من منشط مع بعض في كورس واستاك واحد
غير معرفة كل شيء عن المنشط بتاعك والاستاك اللي هتدخل بيه وجرعاتك واوقاتها , لازم برده تكون دارس كويس أوي مضادات الاعراض الجانبية للاستاك بتاعك في مرحلة الكورس نفسة وفي مرحلة التنظيف او الPCT ودي مرحلة بتكون بعد الكورس مسؤلة عن ارجاع هورمونات الجسم لمعدلاتها الطبيعية في اسرع وقت ممكن وهو فترة البي سي تي
كل ما زودت منشطات في الاستاك بتاعك كل ما زادت الاعراض الجانبية اللي انت محتاج مضادات لها .. وكل ما زادت الجرعات كل ما زادت الاعراض برده اللي انت محتاج مضادات لها
ولازم تعرف وانت بتنظم الكورس ان في كذا نوع من الكورسات ولازم تكون عارف انت هتبدأ انهي نوع فيهم والمفروض انك تكون مجربهم كلهم عشان تعرف افضل حاجة مناسبة ليك من الانواع دي .....
كورس المبتدئين
اي حد مبتدئ على المنشطات لسة وبيقول يا هادي لازم له شوية عوامل اضافية لازم ياخدها في الاعتبار في اول كورس له ..
أول حاجة انت المفروض انك لا تستخدم المنشطات الا في حالة ان جسمك توقف فعلا عن النمو , بالنسبة للرجال وهم موضوعنا في الوطن العربي بيتوقف النمو تقريبا في سن الــ20 وده القاعدة العامة وطبعا لكل قاعدة شواذ ( شواذ يعني انحراف عن القاعدة يا أبطال
( يعني برده انحراف عن النمو بعد سن العشرين عشان انا عارف في ناس دماغها جامدة ههههههثانيا لازم تكون في الفورمة . يعني :
انك تكون بقالك حوالي تلات سنين بتلعب ومنتظم في الصالة وعارف انت بتعمل ايه كويس اوي وعلى الاقل في دماغك كمان سنة ونص في الصالات , يعني مش روحت لعبت شهرين تلاتة وفي الرابع عاوز تعمل كورس وتشتغل بقى ... عشان على الاقل تستفاد من كورسك والاستاك اللي هتجيبه ( الكورس مش بأربعة جنيه
) واحنا مش كلنا رجال اعمال واخيرا لازم تكون مرتاح نفسيا لموضوع المنشطات يعني لو داخل وموسوس من الاعراض والاضرار والكلام ده يبقى بلاش تدخل احسن لانك مع اول الاعراض ممكن توقف الكورس بالكامل وده طبعا شيء احنا مش عاوزينه يحصل لما يترتب عليه ايضا من خساير مادية ومعنوية وجسدية في نفس الوقت
على الرغم من وجود انواع كتير جدا جدا من المنشطات المتاحة انهاردة , الا ان دايما افضل شيء للمبتدئين هو التيستوستيرون النقي كبادية واول كورس ...لانه يعتبر هو العنصر الحي في معظم المنشطات والعنصر المشترك فلازم تعرف انت جسمك بيتجاوب وبيرد معاه ازاي ..
و 400 مج في الاسبوع كمبتدئ جرعة كافية عشان تشوف نتايج مرضية في اول كورس , وأول كورس في العموم المفروض يبقى 12 اسبوع طبعا غير فترة التنضيف على حكينا عنها في الاول
بعد أول كورس ليك انت ممكن تبدأ بالهادي كده تولف ستاك في الكورس بتاعك وبرده خلي أول كورساتك كده كبداية 12 اسبوع طبعا برده غير فترة التنضيف
خلاص بعد ما بدأ جسمك يعتاد على المنشطات اللي داخلة وتعلمت خلاص تولف الاستاكات بتاعتك اللي تناسبك ممكن تجرب بقى الانواع المختلفة من الكورسات والاستاكات عشان ترفع النتايج لاقصى حد ...
ومن أكتر انواع المنشطات المتداولة دوليا هم :
ثلاث اسابيع خاطفة
كورس صغير مضاعف
كورس الهرم المقلوب
كورس الماس
ويتبع إن شاء الله لو يستاهل
الموضوع منقول وحصري من منتدى الديفيدي انا نقلته لتعم الفائذة
No comments:
Post a Comment