العوامل المؤثرة علي لاعب كمال الاجسام و كيف تحافظ علي جسمك

بسم الله الرحمن الرحيم
.............................

ازيكم يا شباب ايه الاخبار
دا يمكن يكون اول موضوع لي في المنتدي هنا و يارب يعجبكم و تستفيدوا منه ان شاء الله
موضوعى النهارده بيتكلم عن

العوامل المؤثرة علي لاعب كمال الاجسام و كيف تحافظ علي جسمك!!!!

لا شك ان العضلات القويه حلم كل لاعب كمال اجسام بس هل سبق وكنت بتتمرن مع احد أصدقائك ،
نفس التمرينات ونفس المدة الزمنية ، إلا أنك اكتشفت أن التأثير النهائي مختلف على كل منكما؟
-من المعروف علميا إن تأثير التمرينات على العضلات تختلف من شخص لآخر ، وهذا الأمر قد يكون راجعاً للعديد من العوامل ، الوراثي منها والذي يصعب التحكم فيه ، لأن العوامل الوراثية لها تأثير كبير علي الشكل البنائي للجسم ، لكن مازال هناك العوامل المؤثرة في درجة نمو العضلات

الله ايه دا ... دا الكابتن عطيه بقي عامل فيلسوف و بيقول كلام كبير قوي.
طبعا علي طريقة الكبار هرد و اقول بس اصبر علي رزقك " معليهش احنا بنتكلم يعني"
يااااااااااااااااااااه دا انت رغاي قوي انجز يا عم الحاج ورايا تمرين و اكل مش فاضيلك

بسم الله نبدا علي البركة

كام واحد فينا يقولك انا باتمرن بقالي فتره طويله اوي و مع ذلك مازدتش او محصلتش علي الجسم اللي انا عاوزه مع اناي باكل كويس و مواظب جدا اه و الله و اسأل الواحد حموكشه صاحبي و رفيق الكفاح و شريك الجريمه هوا بقي تنين و انا لسه كتكوت . و كام واحد يقولك دا انا خدت مكملات و ما زدتش زي ما انا عايز او ما خستش زي ما كنت متوقع ... ارجع و اقولك انت السبب انت اللي ما اخدتش بالأسباب ...
يعني ايه الكلام الغريب دا يا كوتش انت بتقول اي كلام علي فكره و ما انتش عارف اي حاجة...
طيب بص يا جامد فيه عوامل بتؤثر سلبا و عوامل اخري بتؤثر بإيجاب علي لاعب كمال الاجسام بصفه خاصة و علي الرياضيين بصفه عامة رجعنا للكلام الكبير بقي تاني ..
لا ياض اسمع بقي ما تبقش مستعجل

العوامل السلبيه

هي العوامل اللي بتخلي جسمك في حاله هدم او عدم بناء للعضلات و نذكر منها

1- السهر

يعني ايه يا كوتش الكلام دا ... كلما تسهر و تقل ساعات نومك و تلخبط الساعة البيولوجيه بتاعتك " خد عندك" انخفاض في مستوي الهرمون الذكري التستوستيرون و فيه دراسات و ابحاث امريكيه عن الكلام دا لا يتسع المجال لسردها .و كما بيأثر سلبا علي هرمون النمو لانه المفروض انه بيشتغل بالليل و انت نايم و انت اهدرت ساعات النوم بالليل و كمان له علاقه قويه بتقليل التركيز و النشاط و الشعور بالخمول ..... الله الله دا شكل الموضوع جد ولا ايه يا خبر ابيض
من الاخر عشان اريحك يا جامد " السهر بيلخبط الهرمونات في جسمك و بيخلي جسمك في حاله عدم استقرار"

2-عدم الأستمرار في التمرين او التمرين المقطع

كتير مننا يروح الجيم سنه و لكن مش بمواظبه و مثلا تلاقينا بنروح 6 شهور و نريح شهرين او ثلاثه
و هكذا ... عدم الانتظام في اللعب بيرجعك تاني لنقطه البداية هوا اه العضله بترجع بالتمرين بس الأفضل انك تستمر عشان تعمل فورمه جامده بدل ما كل شويه نلعب و نوقف و نهد و نبني .

3- عدم التغذيه الصحيحه

العدو اللدود لجميع لاعبي كمال الاجسام ليه؟؟؟ لان بالنسبة للي بيخسس مثلا تلاقيه عمال يجري و يلعب كارديو و بيتمرن جامد اوي و بعدين تلاقيه اول ما يشوف الاكل يديها و مفيش نظام في الاكل فكدا عامل زي اللي بيفحت في البحر و حتي لو بياخد 100 حارق للدهون... دا بالنسبة للي عندهم سمنه امال بقي الناس اللي عندهم نحافة برده تلاقي الواحد من دول بقولك انا باكل اكل يا كوتش تقولش ديناصور ولا بيبان عليا خالص و دا مش عشان هوا هارد جينر بس النوع دا بتلاقيه مثلا بياكل اكل لايتناسب مع الوزن اللي عايز يزيده او ان سعراته من الاكل دا لا تكفي لزيادة الوزن او النمو الصحيح و مثلا مش موزع اكله علي مدار اليوم و مش بياكل حاجات لها قيمه غذائية عاليه.

4- التمرين الخاطئي

يعني ايه دي كمان يا فيلسوف عصرك قول و اشجيني
تصدق بالله انا ايدي وجعتني !!!! و احتمال ما كملش بس عشان خاطر الكباتن الجامدين هأكلمل
بص يا باشا في الحته دي حدث ولا حرج فيه ناس كتير بتغش و تضحك علي نفسها في التكرارات بدل ما يلعب 10 تكررارت في المجموعة يقولك يا عم محدش واخد باله كفايه 8 او 9 يالا خلينا نشوف اللي بعده او ممكن يكون بيأدي التمرين بطريقه خاطئة يعني تلاقيه بيلعب تمرين زي البنش بريس و تلاقي واحد بيساعده من اول عده " دا نقوله حمادة بالجنزبيل اللي بتعمله دا غلط ".
· الاحماء برده لو مش كافي ممكن يعرضك لأصابه او مزق و فيه تمارين كتير للأحماء قبل التمرين و المواضيع كتير هنا في القسم عن التمارين دي

6- التدخين و الكحوليات

النقطتين دول بالذات واضحين لاي حد بيلعب كمال اجسام بالذات لان التدخين بيؤثر سلبا علي التنفس و يؤدي للوفاه !!! ههههه و الكحوليات بتنهش في جسمك و بتؤدي الي تليف الكبد و حاجات كتير كلنا عارفنها.
و الصورة دي خير دليل

7- هرمون الكورتيزول " الهرمون الاخطر" و الأوفر ترييننج

من اخطر العوامل المؤثرة علي اي حد بيلعب كمال اجسام و لن اخوض في هذه النقطه كثيرا ولكن سأقتبس كلمات من موضوع الكابتن الكبير كابتن دريمر
كام واحد فيناما اتمرنش زيادة عن اللزوم فى الجيم و لو مرة فى حياته على الاقل .. انا عن نفسى كنت بروح العب ل ساعتين ولا حاجة شغال بقتل فى نفسى .. اكيد انت كمان كنت بتعمل كدة لانك كنت فاكر ان بالطريقة ديه هتزيد و تبقى وحش طبعا و عضلاتك هتبقي رهيبة
و انا وضحت ان كل ده كان اشاعات و كلام فارغ و ملوش اى لازمة بل بالعكسانت كدة بتخس و بتتعب نفسك على الفاضى من غير اى نتائج
الكورتيزول: هو هرمون منشط يفرز عن طريقة غدد الكلية و يسمى ( هرمون الضغط و التوتر The Stress Hormone ) عشان بيزيد نتيجة التوتر العاطفى و البدنى و هو ايضا المسئول عنعمل كل اجزاء الجسم
نقص او زيادة هذا الهرمون تؤدى الى العديد من حالات الضعف البدنى و المرض

اسباب زيادةالكورتيزول فى الجسم:
1- التمرين الزائد فىالجيم
2- الجدال مع واحد صحبك او حتى مع العائلة
3- انك تروح مشوراك ولاشغلك متأخر
4- القلق و التوتر على الامتحان الجاى و تلاقى لسة عليه شهرمثلا
5- الزحمة و الاشارات اللى مبتخلصش و القرف بقى
6- الاعمال المتطلبةللمجهود البدنى
7- القلق على الوجبات و المستقبل ( يااااه انا بكرة هعمل ايه لمااصحى .. طب مشكلة البيض خلص كدة مش هعرف اتعشى انهاردة .. طب خلاص انا هاكل بطاطس .. الخ )
8- المرض
9- ارتفاع درجة الحرارة

8- فقدان الرغبة فى التمرين و الحافز

يعني تيجي تروح الجيم تلاقي نفسك مش قادر او ملكش نفس تروح و ممكن كمان لما تنزل لو واحد صاحبك قالك يا عم انت تعبان النهارده تعالي نقعد علي القهوة تروح زي الوحش و تنفض للتمرين
صح ياض يا حموكشه حصل ولا لا .... خلاص يا كوتش مش لازم نسيح قدام الخلق

فحاول تشوف لك زميل او شريك في الجريمة عشان تحمسوا بعض ولما تدخل الجيم مفيش رجوع " مش تعمل لي زي الشباب النايتي مش قادر و اه يا ظهري و الكلام دا اضرب منتج الباور او البامب و سخن كويس و عاش يا جامد
يعني واحد زي الناس الحلوة دي كدا

9- الأصابات

اه ما هيا الحكايه ناقصه كمان اصابات تقعدنا كام شهر نتعالج و احتمال نبطل خالص و نوقف المسيرة عشان كدا بقولك سخن كويس و شيل علي قدك و اعرف قدراتك و قدرات جسمك بدل ما يجي لك مزق يخليك تبطل خالص و ممكن يبقي الاصابه معاك بقيه حياتك

يا عم الحاج خنقتنا و عقدتنا روح يا شيخ و ابقي تعالي بسرعة
هأقولك صبرك عليا نيجي بقي للنقطه المضيئه في الموضوع
ايوة كدا جبت لنا اكتئاب يا عم الحاج غير بقي الموضوع

العوامل الايجابية

تلك العوامل اللي بتخلي لاعب كمال الأاجسام يتقدم بسرعة في اللعبه و يحقق انجازات و فورمة جامده لو اخذها في الاعتبار
طيب يا عم الحاج ارحمنا و قولنا زي ايه
ماشي يا حموكشه هأقولك حاضر زي ايه !!!!!

1-الحماس:

انت يا حبيبي انتا و هوا سقفه جامده للكوتش الجامد يا ابني
هتهرج هأديلك بالبار الزجزاج في صدرك دا
المهم نرجع لكلمنا

فالتمارين لو بتلعبه و انت قرفان او مضايق عمرك ما هتحصل حاجة و لكن لو بتلعب بحماس هتلاقي الموضوع مختلف بدل ما تشيل 30 و 30 في البنش بريس لا هتشيل 40 و يمكن خمسين
و الحماس مطلوب لجعل العضلات تعمل بصورة أفضل ، وإستخدام الطاقة ، كما أن لها تأثير على خلايا الجسم وهو ما يجعلها تنمو بصورة أكبر وأسرع ، فالحماس خلال ممارستك لهذه التمارين يجعلك أكثررغبة في الوصول لهدفك وبالتالي يحسن من آدائك العام.

2-التغذية السليمة:

دا المحور الاساسي بجد فبعد المجهود الكبير الذي تبذله في التمارين و الجيم و انهاك العضله فانه يوصي بعد التمرين مباشره انك تأخد منتج البروتين بتاعك و اكيد طبعا تأكل جيدا عشان تعوض اللي فقد من جسمك اثناء التمرين لان الجسم يحتاج لمصدر لإعادة شحنه بالطاقة ، وهذا المصدر هو التغذية الصحية والسليمة.و كذلك تختلف التغذية من شخص لأخر حسب احتياجه للبروتين و الكارب و الدهون يعني مثلا الشخص النحيف بننصحه انه ياكل اطعمه فيها بروتين و كارب كتير عشان يعوض السعرات اللي مش عارف يحصلها و كذلك بالنسبة للشخص اللي عايز يخسس بنقوله خد بروتين بس قلل االدهون من اكلك و خد حاجات فيها كارب بسيط.

3-الراحة :

الراحة كذلك من اهم العوامل المؤثره و المفروض بعد كل هذا المجهود اللي احنا بنبذله في الجيم يبقي من الواجب علينا ان احنا نريح الجسم وو نعوض كمية الطاقة التي يفقدها خلال التمرين ، بأيام الراحة لان زي ما احنا عارفين دا اللي بيبني العضله " يعني العضله بتنمو بالراحة و التغذيه مش بالاهلاك في الصاله فبالتأكيد يحتاج للجسم بعد كل هذا فرصة للراحة ، وهو ما يجعل إصابة العضلات بالإجهاد أمر مستبعد ،

4-شريك الجريمة او صديق الكفاح:

كما ذكر اخونا رجائي في كتابه كفاحي و قال انه كافح و تعب جدا عبال ما وصل للفورمة بتاعته و دا بسبب ان ما كنش معاه رفيق طول الطريق ....فمن هنا ظهرت اهميه شريك الجريمه عشان يشجعك و يقول لك عاش يا دبابه و روح يا وحش و جووووووود عاش يا معلم و الخ من كلمات التشجيع و التحفيز فهذا الصديق بيشدك معاه لفوق و يخليك تشيل و تتحمل و تفضلوا تحمسو بعض و تشوف هوا وصل لأيه و انت بتحاول تبقي زيه او افضل منه .

5-التنويع :

رجعنا للفلسفة تاني يا عم و الله هنام منك يا كوتش ارحمني لخص يا عم
ياض يا حموكشه هديلك بالدمبل ال 30 في كتافك دي
خلاص يا كوتش الطيب احسن
التنويع مطلوب في كذا حاجة عشان الملل يعني ايه الكلام دا بص يا جامد
المفروض تنوع في اكلك مش كل يوم بيض مسلوق و لبن خلي يوم تونه و يوم سمك و يوم لحم و يوم فراخ غير نظامك الغذلئي بس قبل كدا احسب و ظبط السعرات عشان الموضوع ما يضربش منك.
المفروض تغير الجدول بتاعك في التمرين كل فتره حتي لا تعتاد العضله علي نفس المجهود و الحركة و بالتالي مش هتزيد ولا هتتطور في اللعبه و يفضل كمان تاخد لك فتره هدنه بتاع اسبوع كل 3 شهور عشان تروق الدي و تكبر الجي " مش بقولك يا كوتش عامل فيها دبور " اما نشوف اخرتها معاك ايه

6-نظام تغيير المكملات :

يعني الموضوع بيديلك شويه حماس و تقول اما اشوف المنتج دا هيعمل معايا ايه يعني مثلا انا جربت الجاك 3D اللي قال لي عليه سامو صاحبي و لقيت نتائجة كويسه و بعدها اجي اسمع من رجائي يقولي النو اكسبلود الجديد دا حكايه بيبقي عندي لهفه اجربه عشان اشوف هيدي نتائج عامله ازاي فبيدي لي دفعه معنويه كويسه

7-اتفرج على فيلم للبطل اللي بتحبه

يعني مثلا قبل ما تروح التمرين اتفرج علي فيلم او مقاطع فيديو للبطل اللي بتحبه مثلا انا بحب النجم الكبير العملاق الأسمر الطويل "اه بدأت تقلش تاني و تمثل يا كوتش" الكابتن روني كولمان صاحب الظهر الأسطوري اشوف تمرينة ظهر ليه قبل ما اروح الجيم افتكره و انا بلعب اقوم اشيل وزن كويس و اتمرن بحماسشديد فيه ناس بتحب جاي كتلر زي كابتن Mr Tatoo و فيه ناس بتحب نجوم تانيه شوف اللي بتحبه عشان يديلك دفعه

8- الموسيقي

اه كدا يا شيخ خلينا نهييص بقي و نعرف نشيل وزن
مش بقولك يا حموكشه شكلك عايز تنضرب
ليه بس يا جامد دا الموسيقي جميله و انا بحب اسمع عبد الباسط حموده و الشعبي و المزمار
اقولك ايه مش فاهم حاجة بص انا هألخص و اجيب من الاخر عشان نخلص و نقفل الموضوع بقي انا هأحطلك بتاع يجي 40 او 30 تراك اسمعهم و انت بتلعب و قولي رأيك عشان دول من موسيقي ال heavy meatl و موسيقي بتخلي الادرينالين يشتغل